Sugira Ernest yahagaritswe n’ikipe ye ya APR mu gihe kitazwi kuri uyu wa mbere tariki 21 Ukwakira 2019, nyuma yo gutangaza ko yibona cyane mu ikipe y’igihugu kurusha mu ikipe ye ya APR, kuko bamusaba bamusaba gukina agaruka inyuma gato mu kibuga hagati bigatuma atabona uburyo bwinshi bwo gutsinda.
Mu kiganiro yahaye itangazamakuru nyuma y’umukino APR yari yahuriyemo na Marines,umutoza Adil Mohammed Erradi, yavuze ko impamvu atitabaza Sugira riko kugeza ubu afite Usengimana Danny n’abandi bakinnyi bagaragaje ko bakwiye gukina.
Ati“ Ngiye kubabwira ukuri yego, ukuri kurigaragaza. Icya mbere mbona ari ukudutesha icyubahiro kumbwira kubanza mu kibuga Sugira. Icya mbere ni uko mfite rutahizamu utsinda ibitego bine mu mikino ine ya shampiyona. Kuri ubu mfite Danny utsinda ibitego bine. Uyu munsi nazanye undi rutahizamu ampesha penaliti mu gice cya kabiri yatumye dutsinda bityo mba numva ari ugusuzugura ikipe, abakinnyi, ba rutahizamu bannjye.”
Icyo Sugira atangaza
Rutahizamu wa APR FC, Sugira Ernest, yasabye imbabazi ubuyobozi, abatoza n’abakunzi bayo kubera amagambo aherutse gutangaza kuri iyi kipe y’ingabo bikamuviramo guhagarikwa mu gihe kitazwi.
Mu ibaruwa yandikiye Ubuyobozi, akayishyira ku rubuga nkoranyambaga rwa Instagramm, Sugira yavuze ko yiseguye kuri iyi kipe yamugaragarije urukundo mu myaka itatu ayimazemo ariko we akarenga akavuga ko atishimira uko akinishwa.
Ati” Ku buyobozi bwa APR FC, abatoza n’abo bafatanya, abakinnyi bagenzi banjye ndetse n’abafana b’akadasohoka b’iyi kipe nziza ya APR FC. Namaze kumenya ko narengereye nkabatenguha ku rukundo munkunda, mwampaye ubuzima ndetse munampa icyerekezo cyiza.”
“Mfite isoni ndetse ndicuza nkaba nsaba imbabazi zo kuvugira amagambo atari akwiye mu kiganiro n’itangazamakuru nyuma y’umukino w’Amavubi na Ethiopia, nari nataye umurongo, byari byandenze.”
“Ndabizi ko ibyo navuze byabababaje, ntabwo ari icyo nari ngamije, ndishinja amakosa ku bwa buri kimwe navuze kuko narakosheje. Ndabasaba ko mwambabarira.”
Sugira Ernest w’imyaka 28, yakiniye APR FC bwa mbere mu mwaka w’imikino wa 2013/14 ubwo yari avuye muri AS Muhanga, ariko nyuma yo kudahirwa yerekeza muri AS Kigali.
Yagarutse muri iyi kipe y’ingabo muri Kanama 2017 amaze gutandukana na AS Vita Club, ahita agira imvune yatumye amara umwaka urenga adakina.
Kuva agarutse mu kibuga hagati mu mwaka ushize w’imikino, amaze gutsindira APR FC ibitego bibiri mu marushanwa abiri yemewe ategurwa na FERWAFA.
Mu mikino ine ya Shampiyona APR FC imaze gukina uyu mwaka, yitabajwe ku munsi wa mbere (ku mukino wa AS Kigali), asimburwa na Mugunga Yves mu gice cya kabiri.
TUYISHIME Eric
